ban m di w

An nou gade nan epizòd sa a, èske se vre te gen yon lè cheve natirèl te alamòd ? Si wi, sa k fè l pa almòd ankò ? Si non, ki danje ki genyen pou fanm ak tifi, lè nou kite sosyete a deside nan plas nou, men ki sa ki akseptab, atiran osinon ki  bèl nan je l sitou bagay ki lakay nou, nou pa ka chanje.

Nan epizòd sa a, n ap chèche konprann relasyon gason ki nan dyaspora a ak jèn fanm k ap viv an Ayiti. Sou kisa relasyon sa yo souvan chita? Èske gen danje lè yon dyaspora rantre nan peyi a, jis pou vin pwofite de tifi ak jèn fanm ki anpil fwa pa konprann jwèt y ap jwe a?

Epizòd sa a chita sou preferans nou nan sosyete ayisyèn lan pou moun po klè. Ladann, n ap fouye pou n konprann poukisa moun ki plis benefisye de sa toujou santi yo atake pèsonèlman, lè sijè sa a pran lari. Ki enpak preferans nou pou grimèl kontinye genyen sou jan nou youn wè epi trete lòt an Ayiti?

An nou gade, nan epizòd sa a, kòman fanm ka aprann kouri dèyè yon lanmou kote y ap bay men y ap pran tou, nan yon sosyete kote tèlman pa gen ekzanp sa a ant fanm ak gason.

 Nan premye epizòd Ban m di w sa a, m ap gade jan nou leve tifi pou yo pèdi tan yo epi pèdi tèt yo nan relasyon ak gason an Ayiti. Youn nan 2 envite nou yo rele sa madjigridji. Ansanm, nou gade jan sosyete a fè tifi ki tounen fanm pita peye byen chè pou sa. Istwa envite yo pèmèt nou pi byen konprann ijans ki genyen pou moun ki konsyan de madjigridji sa a pou yo chavire chodyè a. M ap kontan li opinyon w anba epizòd sa a. Ou ka kite kòmantè nan seksyon ki fèt pou sa sou platfòm w ap tande pòdkas STZL la.

Nan epizòd sa a, m ap pataje ak ou plis detay sou pòdkas STZL la. Detay tankou: sou ki sijè ban m di w pral pale, ki fòma l ap itilize, èske w ap ka patisipe? Al tande l kounya a sou platfòm tankou Spotify, Apple Podcasts, SoundCloud ak Google Podcasts. Abòne w depi kounya a, pou w pa janm rate yon epizòd.

Byenvini nan pòdkas STZL la!