هلوسة مسموعة مع فادي زويل

بتصحى كل يوم الصبح وانت حاسس بإرهاق وإنك مخدتش قسط كافي من الراحة؟ كل ما يكون عندك حاجة مهمة محتاج تعملها تفضل تأجلها وتشغل نفسك بحاجات تانية هايفة؟ وقتك بيضيع و بتحس أنك إنسان استهلاكي ومش منتج؟ متقلقش أنت مش لوحدك ، ولكن أنت الوحيد اللي ممكن تغير الواقع ده وتصبح إنسان منتج وأهدى نفسياً - هطرح مجموعة أفكار سريعة للتغلب على العادات السيئة اللي ممكن تفسد يومنا وتخلي عندك طاقة ايجابية

لما بتقابل واحدة و بتسألك برجك ايه؟ وبعدين تبدأ هي تحلل شخصيتك وتصرفاتك ، بتصدق الكلام ده؟ طب تعرف إن في رؤساء في دول متقدمة وحديثة كانوا بيستخدموا دجالين علشان يعرفوا تأثير قرارات سياسية مهمة ويختاروا بناء على نصيحة العراف يعملوا ايه … سيبك من الهري ده وتعالى اقولك على طريقة سهلة ممكن تتنبأ عن طريقها بأشياء ممكن تحصل في المستقبل وتتخذ قرارات نسبة نجاحها كبير لحد كبير

هو رمضان بالنسبة لك عادة ولا عبادة؟ هو سؤال فلسفي وحابب أجاوب عليه من تجارب السنين والمراحل العمرية اللي واحد مر بها تاني انا مش بشكك أن صوم رمضان عبادة وأنه من أركان الإسلام الخمسة ، بس السؤال اللي بطرحه هو رمضان بالنسبة لكل واحد فينا بيمثل ايه؟ وهل رمضان واللي بيحصل فيه بيختلف حسب ظروف الإنسان النفسية والثقافية والاجتماعية؟ تعالى نحكي شوية عن رمضان وازاي الناس بتستقبله في البلدان المختلفة، ومتى يتحول لعادة بدل ما هو عبادة

هرموناتك متلخبطة؟ هل في مرة مرة حسيت أنك مش عايز تقوم من النوم ومعندكش طاقة تعمل اي حاجة؟ هل لاحظت مؤخراً انك بتعمل من الحبة قبة و دمعتك حضرة ومشاعرك وأحاسيسك مش مستقرة؟ تعالى واسمع الهرمونات زي التستوستيرون و الاستروجين ممكن يعملوا ايه في الواحد

ايه سبب انتشار الحشيش وظهور منتجات كثيرة من مشتقاته في أمريكا؟ ايه سر انتشار الحشيش ومخدرات تانية مثل الافيون والهيروين في أوائل القرن العشرين في مصر؟ طب ليه الناس بتحاول تهرب من الواقع عن طريق التعاطي ؟ طب شكل المخدرات هيبقى عامل ازاي في المستقبل ؟ - يلا بينا نبدأ الحلقة ونكلم عن الحشيش

سألت صديقي برنامج الذكاء الاصطناعي Chat gpt ليه نسبة الطلاق زادت مؤخراً وإيه هي الأسباب اللي ساهمت في ارتفاع النسبة ، تعالى وأسمع معايا الرد و هنكلم عن الجواز في الماضي والحاضر والمستقبل ، هو ممكن الإنسان يجوز أصدقائه الآليين ؟

في الفترة الأخيرة وخاصة بعد الكوفيد العالم كله اتغير وأصبحت حياتنا مختلفة وده أثر على حياتي أنا شخصياً وعملياً ، بعد ما كنت بسافر كتير وألتقي بـ ناس من جميع أنحاء العالم لقيت نفسي قاعد في البيت معظم الوقت ، بدأت الأفكار المجنونة تداعب خيالي وعشان كده عملت البودكاست ده عشان اشاركم الأفكار ده ومن خلالها أقدر أنفس عن مشاعري في عالم قاسي أصبحت كل المشاعر والعلاقات الإنسانية عبارة عن صور كاذبة منتشرة على السوشيال ميديا لا تعبر على حقيقة ما يدور بداخلنا، هنتكلم عن مواضيع زي الجواز والصداقة والأهل والتقاليد، والاختلاف بين الماضي والحاضر ونحاول التنبؤ بالمستقبل وكل ده في حلقات لا تزيد كل منها عن ١٠ دقائق