De Podcast iwwer Léierstéierungen

An eisem 11. Podcast schwätze mir mam Sarah Urbing iwwert säi schwierege schoulesche Parcours. Hatt hat de Verdacht eng Dyskalkulie ze hunn an huet sech als Erwuesse Fra Hëllef gesicht. Wéi et him haut geet a wat him gehollef huet Beruff, Erwuessenebildung a Famill ënnert een Hutt ze kréien, héiert Dir an dësem Podcast.

An eisem 10. Podcast geet et ëm standardiséiert Tester. Wat si standardiséiert Tester? Wisou brauch een se? A wat ass d’Plus-Value wann sou Tester an de Beräicher Mathematik a Liesen/Schreiwen op déi Lëtzebuerger Schoul-Populatioun ugepasst ginn?

An eisem 9. Podcast hu mir een Témoignage vun enger Fra déi am Erwuessenenalter d’Diagnos Léierstéierung krut. Si erzielt eis wéi dat fir si war, wéi hire Parcours bis dohi war a wéi sech hirt Liewen dono verännert huet. Mir schwätzen och iwwer verschidden Hëllefstellungen a Strategien fir den Alldag vu Betraffenen ze vereinfachen.

An eisem 8. Podcast geet et ëm d’Analyse vun der schoulescher Situatioun vun engem Schüler an déi geziilte Fërderung. A wéi dës 2 Etappen eis kënnen Opschloss ginn ob ee Kand oder Jonken eventuell eng Léierstéierung huet.

An eisem 7. Podcast geet et ëm d’Liewe mat Dyslexie. Dyslexie ass eng Léierstéierung, déi engem d’Liesen an d’Schreiwen erschwéiert. Mee mat enger fréizäiteger Diagnos, an den richtegen Hëllefsstellungen, wéi Strategien an Adaptatiounen, kann ee säi schouleschen a beruffleche Parcours gutt meeschteren. Iwwert hire Wee bis elo, erziel eis haut eng Betraffen.

An eisem 6. Podcast geet et ëm d’Schoulvakanz an ob Kanner a Jonker mat Léierstéierunge sollen an der Vakanz léieren oder net, wéi vill soll geléiert ginn a wéi een dëst Léieren kann sou angenehm a positiv gestallte wéi méiglech.

An eisem 5. Podcast informéieren d’Sandy Spielmann, Léierin am CDA an d’Caroline Hornung, Research Scientist op der Universitéit Lëtzebuerg doriwwer wat ee ka maache wann ee Schüler d’Diagnos Léierstéierung gestallt krut. Si erkläre wéi eng pedagogesch an didaktesch Upassungen am Unterrecht kënne gemaach gi fir dem Schüler den Alldag z’erliichteren.

An eisem 4. Podcast gi mir op d’Prozesser vun der Erkennung an dem Diagnostik vun ADHS an, souwéi op d’Akteuren, déi an dëse Prozesser involvéiert sinn. Am zweeten Deel vum Podcast schwätze mir och iwwer d’Formatioun an d’Sensibiliséierung.

An eisem 3. Podcast geet et ëm d’Opmierksamkeetsdefizit-/Hyperactivitéitsstéierung, ADHS. Wat ass ADHS, wéi erkennt een et, a wat kann een ënnerhuelen am schouleschen Ëmfeld? Wéi kënnen Elteren déi éischt Unzeechen erkennen, a wat kënne si ënnerhuelen?

Léierstéierunge sinn net ëmmer einfach z’erkennen, a scho guer net an engem multilinguale Kontext wéi deen, dee mir hei zu Lëtzebuerg hunn. Dat ass och am Handbuch “Lernstörungen im multilingualen Kontext: Diagnostik und Hilfestellungen”, dat mir zesumme mat der Universitéit Lëtzebuerg erausbruecht hunn, nozeliesen. Am 2. Podcast erkläre mir Iech d’Begrëffer Léierschwieregkeet a Léierstéierung a ginn op d’Ënerscheeder tëschent deenen 2 an. Zudeem erkläre mir den Diagnostiksprozess, a setzen ee besonnesche Fokus op de lëtzebuergesche multilinguale Kontext.

Léierstéierunge sinn net einfach z’erkennen an engem multilinguale Kontext wéi deen zu Lëtzebuerg. Eise Podcast soll opklären an Iech dës Thematik méi no bréngen. Am 1. Podcast wëlle mir Iech erzielen wat dem CDA seng Missiounen an Ziler sinn a wéi et zu der konstruktiver Zesummenaarbecht mat der Universitéit Lëtzebuerg komm ass.