故鄉。生活。台語詩

【詩名】：紫藤往回 【作者】：蕭藤村 【詩文】： 春意褪落一身的青色 換一軀跳舞的衣裳 佮皇帝相爭茄仔色 茄仔色真合舞弄青春 迎春 隨風 舞一齣一冬的告別 舞過了後 剪掉枝骨 暫時告別 明年重來 顛倒大葩 顛倒媠豔 年年往回 並無厭𤺪 伊咧聽候 聽候媠色 伊咧準備 準備媠齣 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：野百合 【作者】：藍淑貞 【詩文】： 山頂的野百合 親像號令兵 舉一支白色的古吹 軁過石頭縫 軁過赤查某的草刺 軁過菅芒的牽纏 歕出台灣的春天 海邊的野百合 毋驚炎日的考驗 毋驚秋風的摧殘 毋驚土地的焦鬆 展開白色的古吹 譜一首新版的補破網 歕出台灣快樂的出帆 白色的野百合 有台灣阿媽的信念 有羅漢跤的堅定 自山頂湠到海墘 種佇台灣人的心 譜出民主的歌 歕出台灣人的希望 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：龍眼花當迭開 【作者】：林鳳珠 【詩文】： 蜂 飛值大崗山兮春天 閏二月兮龍眼花正當迭開 咱身軀予抹一點也花芳味 來聽大崗山古早兮傳奇 聽龜會食蛇兮大事 聽瓦會飛起蒞山頂兮神奇 啊！三百年兮古寺 四百年兮文氣 予咱嘛來含一嘴龍眼花蜜 吟一兩首詩 蜂 飛值大崗山兮春天 奚龍眼花漸漸會變作蜜兮芳氣 秋天若是屆 咱得會記得 更再來含一兩嘴蜜 吟一兩首詩 沐著一身兮月光 慢慢也行入後山彼個月娘兮世界去 圖片來源：官秀品 提供 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：老人斑 【作者】：黃勁連 【詩文】： 也無寫批來通知，無張無持 伊就搖頭拌耳，大主大意 偷偷仔走來我的身軀徛去 早起、愛睏的中晝時 抑是恬靜的三更半暝 趕來 佇我的跤婆、手盤、喙邊 釘點做記號 因歡喜甲 講 因已經揣著足好的地理 因足敖拉天的 定定 笑微微共我說起 無免偌久，頭毛落霜雪 青春老去，你就報銷去 毋免偌久 一場眠夢 你就無聲無說，無言無語 親像灶空的火恬恬化去(hua--khi) 人生的歌唱完矣 人誠稀微，頭犁犁 行田岸仔墘轉去 彼時 天頂星佇我的頭殼頂閃爍 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：春天 【作者】：劉惠蓉 【詩文】： 春天歹鬥陣 連鞭吼 連鞭笑 歡喜的時 溫柔輕聲共咱咱 叫咱綴伊跳舞 綴伊去演唱 用伊燒烙的情 畫一幅 上媠的色水 開出美麗的花蕊 受氣的時 呸面歹聲嗽 毋是透風 就是落大雨 一个無注意 害阮傷風流鼻水 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：大型的舞會 【作者】：韓滿 【詩文】： 走過 一稜一稜青蘢蘢（ling）的茶園 一陣一陣的咖啡芳嘛唌人袂倒 叭叭 傱對山頂去 日頭無相辭 就覕入去烏布 雄雄恬啁啁 跕跤跕手歪歪斜斜 濕濕的草埔仔邊 澹澹的溪仔墘 溡溡的樹仔跤 有幾若百蕊目睭 刺過來射過去 哇 細kâi聲仔 噓 噓 噓 干焦喘氣的聲 一葩一葩的光 飛過來 走過去 愈來愈濟 愈來愈光 愈來愈媠 開始一个大型的舞會 查埔的飛落來 邀請閉思的姑娘仔 華爾滋一直跳袂煞 愛的故事就按呢開始 時間 沓沓仔 沓沓仔 過去 看火金蛄的人 慢慢仔 慢慢仔 離開 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：午后 【作者】：林鳳珠 【詩文】： 有一種畫面 猶未變成歷史 有一種歲月 離咱猶無足久 日頭稍許也偏就西 睏晝兮氣氛充滿置庄內 戶橉下彼幾隻鷄也 伸頷頸「咕！咕！咕！」叫起來 阿婆是欲出去 抑是才對菜園也轉來﹖ 痀痀兮身影 行過巷也底兮破處瓦 慢慢兮腳步 無追時代搬徙 園也、市場合古處 是伊全部兮生活 有一種歲月 離咱愈來愈遠 床母做兮記號 親像猶印置古早兮田庄 時間交替出年代 居處愈新愈氣派 有時 斡一下頭才知 細漢兮記智 其實 猶旋置彼大片舊舊兮磚瓦內 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：見笑 【作者】：韓滿 【詩文】： 失戀食弓蕉皮無滋味 症頭掠無著無法度醫 再三懇求月老接情絲 毋通叫人啉酒解相思 失戀是誠見笑的代誌 等天暗無人khuainn的時 我欲偷偷仔 偷偷仔 共擲入無人到的海裡 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：柚子酒 【作者】：藍淑貞 【詩文】： 秋天八--月 明亮的中秋月 照佇柚仔園 照佇阿母閃光的目睭 阿母將擘好的柚仔 舀（iúnn）一杓（sia̍h）仔月光 掺伊的夢 一重一重囥佇甕仔底 激出迷人的酒芳 佮微微的醉意 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：彼一年兮春天 【作者】：簡秀如 【詩文】： 彼一年兮春天 斑脂花當迭開 我轉去山頂 接你落山去病院 彼一年兮春天 斑脂花開夠鬧熱熾熾 我坐置眠床邊 窗也外兮風 吹著我心內兮傷悲 彼一年兮春天 斑脂花當也謝去 你恬恬離開 無哭無笑嘛無相辭 每一年兮春天 斑脂花攏開夠赫爾水 我思念你兮心情 就親像奚花蕊 落置土腳嘛猶迭開 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：石頭古意 【作者】：蕭藤村 【詩文】： 石頭嘏一箍槌槌 恬恬釘行[ting3 hing7]佇牆仔邊 無喙無舌 帶淡薄仔古錐 世間人啊 呣免咒讖伊會爛去 設使會爛去 嘛佮人的愛情無代誌 過去就予伊過去 有人嫌伊無清氣 家婆來共伊洗去古意 失去古意 無滋無味 寧可洗出一片青翠 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：雲起來也 【作者】：林鳳珠 【詩文】： 雲若起 緣就來 隨著雲 輕輕也行入來人海 有時向前 有時回頭 有時個己行 有時合人相等候 毋免問路頭什麼時陣 緣若轉 一片輕輕兮雲 就是一個渡口 愛留 毋免走 欲走 毋免勉強留 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：橋 【作者】：韓滿 【詩文】： 講無仝款的語言 過無仝款的橋 賽德克巴萊的族人 講賽德克的語言 查埔人愛做勇士 查某人愛會織布 嘛才會當行 通往祖靈的彩虹橋 講台語予人罰錢 閣掛狗牌仔 行過這座橋 就會曉揣祖先的靈魂 就會曉叫醒囝囝孫孫 咱修理咱歷史的橋 咱講咱家己的語言 圖片來源：-電影賽德克‧巴萊(下)：彩虹橋 劇照 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：柚子花 【作者】：藍淑貞 【詩文】： 佮春風有約會 佇每年的三月 開純白的花 將芳味掖甲滿四界 蜜蜂真心對待伊 娓蝶飛相隨 暗光鳥為伊唱歌詩 蟋蟀仔覕樹仔跤講相思 一陣軟風吹來 樹枝輕輕仔搖擺 花瓣像落雪 樹仔跤鋪白紗 阿母將柚仔花芳 參阿爸的希望 一重一重浸佇甕仔--裡 激出迷人的醉意 泡一鈷柚仔花茶 坐佇柚仔花前 阿爸笑微微 看著八月收成時 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：斑芝舞翼 【作者】：劉惠蓉 【詩文】： 清明雨水濟 天頂蝶仔飛 蝶仔飛啊飛 親像跳舞的斑芝花 身穿柑仔色洋裝 縖著紅蓬裙 空中溫柔展翼 輕巧聊聊仔飛 紅棉斑芝花 阮欲綴你飛 綴你 飛去新市街 佮阮老師約會 歡喜唸謠大聲唱 唱咱上媠的父母話 台灣文化阮來揣 阮是台南的好子弟 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：據在風咧吹 【作者】：韓滿 【詩文】： 據在風咧吹 雲咧飛 山猶原恬恬佇遐坐 據在草咧搖 花咧扭 樹仝款靜靜佇遐徛 據在狗咧吠 鬼咧摧 樹佮山原在 穩如泰山 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：好鼻師 【作者】：黃勁連 【詩文】： 紅狗蟻是好鼻師 天欲落雨伊隨知 佗位煮芳芳 有好食物伊嘛知 好厲害的紅狗蟻 一點仔都無呆 圖片來源：百科知識 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：印度兮櫻花 【作者】：林鳳珠 【詩文】： 印度有一種櫻花 開佇台灣兮路邊 開花兮季節 會當值未寒兮冬天 也會使值冷冷兮春天 印度櫻花開兮時 路兮頂面 會罩一層粉紅也色兮霧 奚霧 對路兮即頭罩去到路兮彼頭 毋知也罩去到誰人伊兜 印度有一種櫻花 佇台灣開兩季 奚粉紅也色兮花霧 對冬天兮彼頭 罩過來屆春天兮即頭 咱行入去粉紅也色兮霧內 慢慢也行 毋知也會行去到誰人伊兜 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：海共阮戲弄 【作者】：韓滿 【詩文】： 海共阮戲弄 害阮走遍海邊 日月潭的娜魯灣 水 涼涼涼 阮的心滾滾滾會燙人 墾丁的南灣 沙 燒燙燙 阮甘願予海風熔去 萬里的野柳 heh heh 喝的人聲 由在阮叫 煞無人應 天星閃爍 放阮暗暝等到早起 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：一領血衫 【作者】：蕭藤村 【詩文】： 一領血衫藏四十冬 藏兩跡的銃空 一跡是藏和平的向望 一跡是藏戇想的臺灣人 血若有性命 敢[kam2]會吼 半暝嘛呣敢[kann2]吼 吼出聲 是吼予人聽 敢[kam2]有人敢[kann2]聽 吼無聲 是吼予家己聽 陳--家四十外冬攏無聲 獨獨 澄波化做一重一重的水波 湠--開 散--去 無--去 臺灣人四百外冬來攏無聲 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：烏頭毛變白頭鬃 【作者】：韓滿 【詩文】： 青春對指頭仔邊漏去 烏頭毛一時仔變做白頭鬃 日光對樹葉仔縫掖落來 一線的燒烙承無著 只有淒涼的烏寒徛佇門窗 無邊無際的暗暝 當時才會有貓霧仔光 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：莿桐樹 【作者】：藍淑貞 【詩文】： 刺桐樹 好花枝 春天若到笑微微 花蕊開甲紅吱吱 親像少女抹胭脂 刺桐樹 半天懸 夏天若到樹葉豔 繁花落盡為啥款 親像阿娘﹙仔﹚惜花欉 刺桐樹 有向望 秋天若到樹葉落 秋風無惜咱花欉 期待春風來疼痛 刺桐樹 無怨嘆 冬天若到樹枝寒 樹葉拍落毋驚凍 化做春泥落塗澹 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：三義有情 【作者】：林鳳珠 【詩文】： 三義兮雪 落值春天尾、夏天頭 鋪置山前山後 三義兮詩 寫置樹枝尾、湖水邊 吟佇路邊處邊 三義兮風會率路 率阮行過彼條長長兮街 率阮欣賞滿山像雪兮花 率阮看暗時一爍一爍兮火 率阮佇山路一條一條直踅 三義有情 準講咱是初相識 你嘛會當用三義兮山水共阮招待 三義兮形影 因為你 深深印置阮兮腦海內 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：雙花戀 【作者】：韓滿 【詩文】： 公花母花相纓纏 見人歹勢緊分離 春風吹來捒 做堆 含笑嬌媚心歡喜 雨霎 滋潤花愈媠 雙魚橋跤咧遊戲 搖頭擺尾讀心語 眉來眼去食著餌 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：圳仔水恬恬仔流 【作者】：黃勁連 【詩文】： 日也流，暝也流 水庫的水 恬恬仔流 若蜘蛛網咧 對烏山頭 流來嘉南平原 每一个鄉鎮、庄頭 流過土地的肌膚、細胞 來到阮庄頭的圳溝 日也流，暝也流 圳仔水恬恬仔流 流過鐵枝路邊 發林投的水溝 日也流，暝也流 田水淹淹仔流 流來田尾 流來田頭 問咱的土地 敢食中晝 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：台江媽 【作者】：劉惠蓉 【詩文】： 鑱鑱錚 鑱鑱錚 紅龜包豆餡 拍鑼摃鼓鑱鑱錚 身體勇健愛硬掙 衫仔褲 穿予媠媠奅奅奅 穿予媠閣奅 迒過戶橂 踅過岸 感謝新寮台江媽 予咱勇氣人生有靠岸 台江媽是阮上親的囡仔伴 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：舞健康 【作者】：韓滿 【詩文】： 迷人的音樂響起 送來臭臊的熟似味 蝦仔 蚶仔 魚仔攏臭火焦芳 濟濟的喙瀾 津--落來 白酒 紅酒 硞來硞去 身軀著火 恰恰 倫巴 踅來踅去 心內著火 心情 愛意 趕袂出喙 哪會遐爾仔鬱卒 敢毋是欲舞健康 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：交流 【作者】：林鳳珠 【詩文】： 東邊溪兮水 是對西邊溪彼邊 慢慢也流過來兮 南邊山兮雲 是對北邊山彼邊 輕輕也飛過來兮 毋是在做回收 是予一份合意兮心情會當交流 毋是僅若即手換過彼手 是有好物件毋免固執一定擁有 你加看 東邊溪兮水 是對西邊溪彼邊 慢慢也流過來兮 南邊山兮雲 嘛是對北邊山彼邊 輕輕也飛過來兮 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：番薯哀歌 【作者】：蕭藤村 【詩文】： 二二八呣是一个一个的日子 是一个予人 予人軟塗深掘的記號 大條蕃薯攏予人掘了了 賰蕃薯根仔覕佇 蕃薯堎下底 蕃薯根仔一直大條 生湠濟濟 養飼百姓 二二八呣是一跡一跡的傷痕 是一款予人 予人呣敢出聲的記持 大條芋仔會予咱掘了了 賰芋仔囝徛佇 蕃薯堎頂懸 踳踏蕃薯根仔 食人夠夠 𣍐死先臭 二二八叫醒蕃薯的冤魂 留落歷史的車痕 二二八釘行[ting3-hing7] 覕蹛尻脊後 壅肥 予蕃薯出頭 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：巧克力的滋味 【作者】：藍淑貞 【詩文】： 二月十四 透一陣西洋風 巧克力有愛情的滋味 巧克力參有阿君仔的情意 將你送的巧克力 勻勻仔含（kâm）佇喙裡 喙內甜甜甜 心肝頭嘛甜甜甜 送一粒予阿君仔試滋味 閣共阿君仔唚一喙 阿君仔笑微微 講阮好情意 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：相思茶 【作者】：韓滿 【詩文】： 啉一喙 對你一見鍾情 想欲化作目尾魚 泅入你的心房 啉一杯 對你刻骨銘心 想欲化作蜜蜂 偷偷仔採你的花芳 啉一壺 對你日思夜夢 想欲化作茶水 一直唚你的喙脣 攏是你害阮耳仔燒甲會燙--人 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：真灼來加讀 【作者】：林鳳珠 【詩文】： 秋天有花會開 春天有樹葉會落 四季兮色彩 看咱用什麼眼光來發覺 道路有短有長 心情有清有濁 一時兮 "舌延" "舌單" 看咱用什麼心態來感覺 事相永遠若假若真 方向嘛毋止是南是北 恢復簡單 是將外表一層一層蛻殼 生命兮文章 咱一頁一頁做夥真灼來加讀 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：月桃淚 【作者】：劉惠蓉 【詩文】： 白汫粉珠淚 —捾—捾 貼佇青布篷 敢是月娘 揣無心愛的伊 綴桃紅花蕊 流落相思的目屎 化作月桃淚 點滴珠淚 是啥的真情淚 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：老朋友 【作者】：韓滿 【詩文】： 一鈷茶 講天 講地 講到半暝 烏龍 春仔 東方美人來陪伴 心內話 溢過來溢過去 一條老情歌 hinn-hinn hainn-hainn 毋成調 mai51 ku11（麥克風）搶來搶去 笑聲攬著目屎跳舞 唱甲醉茫茫 一碗筊白筍 你啉湯 我食筍 燒燙燙的感動 毋管身在天邊海角 心猶原相依倚 一通電話 隨飛到 賰 一个氣絲仔的你身邊 揣你講 聽你笑 激你動 一尾活龍重見江湖 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：水蓮花 【作者】：黃勁連 【詩文】： 水蓮花一蕊一蕊 開佇水墘 風微微 吹送水蓮花的芳味 這款的代誌 這款的 景致 我不時來想起 不時來想起 想起 故鄉佳里興大廟邊的大崛 水蓮花開甲滿滿是 一蕊一蕊佇水墘 風吹伊軟弱的花枝 水鴨一隻兩隻泅來泅去 阮阿叔踮大崛邊挨絃仔 喙唱民謠 思雙枝 一直挨 一直唱 唱甲風恬去 唱甲日落黃昏時 流浪的日子 佇遙遠 的城市 我定定來想起 這款的風味 這款的景緻 一時仔攩袂牢 目箍紅 想欲半暝仔拚轉去 圖片來源：2010臺北國際花卉博覽會數位典藏

【詩名】：袂使放手 【作者】：韓滿 【詩文】： 騎跤踏車 人 兩輪 阮 四輪 人 兩隻手 阮 四隻手 阿爸阿爸 頭前有石頭仔 誠歹 行 你袂使放手 來去學校讀冊 人 一个人 阮 兩个人 人 一雙跤 阮 兩雙跤 阿母阿母 老師是鬼 會掠 人 你袂使放手 踅夜市 人 一手牽一人 阮 兩手牽兩人 人 踅夜市唱情歌 阮 踅夜市 走揣 較早的記持 阿爸阿母 恁 會走拍毋見 阮袂使放手 來去公園散步 人 一人坐一條 阮 兩人坐一條 閣一手牽一手 焦脯 的手一直勼 閣強欲偷走 阿爸阿爸 大路誠危險咱愛行烏白馬遐 阮袂使放手 蹛 套房 人 蹛別莊 阮 蹛套房 門床頂有 阿母的消瘦落肉 椅頭仔頂有 阮的毋甘 阮 兩手牽一手 阿母阿母 汝若放手 是欲叫阮去佗 閣牽汝的手 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：鹹鹹的台灣 【作者】：藍淑貞 【詩文】： 台灣四邊攏是海 鹹鹹的海水 豉出鹹鹹的台灣 豉出台灣人鹹鹹的人生 開始幾落代的曝鹽生活 日本人徵收魚塭做鹽埕 鹽工踏水車 引海水入鹽埕 鹹鹹的汗水 滴入去鹹鹹的海水--裡 赤焱焱的日頭光 掖佇白鑠鑠的鹽埕 鹽工沉重的跤步 扒出一堆一堆的鹽堆 擔出一山一山的鹽山 一山一山的鹽山 一望無際的鹽埕 袂當做飯食 鹹鹹的目屎 吞入枵饑的腸肚 沉重的跤步 綴袂著經濟的起飛 五彩的夕陽 佇 拋荒的鹽埕閃爍 化做精彩的歷史記持 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：春天屆也 【作者】：林鳳珠 【詩文】： 春天屆也 有足濟花攏迭開也 值花開兮所在 咱若適好行過 得毋當忘記得 斡頭加花瞰一下 咱敢真正這無閒﹖ 無閒到手邊兮工課攏未當停﹖ 咱會使無閒 但是毋當無感情 來！春天屆也 咱身邊嘛有花迭開也 值花開兮時陣 咱得會記得 舉頭加花欣賞一下 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。 只顯示部分資訊

【詩名】：樹仔非常秋天 【作者】：韓滿 【詩文】： 樹仔非常秋天 葉仔綴秋風四界去 來到桂花巷欲hiù芳水 樹仔非常寒天 衫褲褪光光咇咇掣 等到好天才欲穿媠衫 樹仔非常春天 枝葉相爭欲出力出頭 為鳥隻欲布置上四序的厝 樹仔非常熱天 南風吹來燒hut hut 為老朋友欲搭泡茶的好位 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：好透老 【作者】：韓滿 【詩文】： 你講 咱是麻糬 規工黏黐黐 我講 咱是芋圓 千切嘛切袂開 無疑悟 歲月的砂石來膏纏 沖出兩條雙叉路 你講 你是風 愛四界拋拋走 我講 我是雲 愛佇天頂飄 風來 就共雲趕走 雲 就飛去港口 風來 擛雲去遮日頭 雲 就飛起去山後 風來 共雲搧甲目屎流 隨閣共雲攬牢牢 雲 感動甲一直吼 風 毋甘雲直直哭 回心轉意欲共雲留 風的熱情予雲苦惱 心中的怨嘛溶去了 一陣大雨到 風講 我欲去佗位揣雲 好透老 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：金針花 【作者】：黃勁連 【詩文】： 五月的風微微仔吹 金針花開甲滿四界 一蕊一蕊 黃gam-gam 頭擔擔(tann-tann)，若鼓吹 五月的風微微仔吹 有夠歹勢，想起細漢的狼狽 予阿母操心有夠濟 想欲共阿母寫一張批， 批內底閣畫一蕊金針花 祝阿母毋須煩惱 食甲一百空八歲 五月的風微微仔吹 金針花開甲滿四界 想起阿母的慈愛 目屎一粒一粒相綴 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：茶花無話無刺 【作者】：蕭藤村 【詩文】： 茶花謝去 我無抾起來泡茶 隨在𢙠落落/lak4 loh8/塗骹化去 明年𢙠佫翻身 旋起去樹椏 展開規身百葉/iap8/的白衣裳 做伊恬恬仔開 恬恬仔媠 𢙠無厚言語 加喙舌是家婆 顛倒是人厚話 厚話嘛顧花怨 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：思念發酵 【作者】：韓滿 【詩文】： 風 淒淒 雨 冷冷 心 罩著烏陰 風 伴日 天清 雲散 思念發酵 一蕊 一蕊 一葩 一葩 一直滾絞 絞出年久月深的氣味 揣著前世今生的跤跡 彎彎斡斡的小路 牽著 思念 一直 發酵 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：有一間古處 【作者】：林鳳珠 【詩文】： 有一間古處 白壁烏瓦 有一間古處 門口一個大庭 有一大片青翠兮草埔 拓去到里德兮山腳 即間古處 就置滿州兮響林 四月、五月 一樸一樸兮野牡丹就會開花 開佇牧草兮田埂 開出山內春天末兮氣味 九月、十月 一群一群兮山後鳥就會飛過 飛佇天頂迭旋迭箍 飛向去南洋兮彼條遙遠兮路 有一間古處 白壁烏瓦 有一間古處 偎近老佛兮山腳 暗時 來茲看流星閃過遠遠兮彼邊山 日時 來茲聽鳥也聲響置四周圍兮樹林 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：年兜 【作者】：韓滿 【詩文】： 年兜的跤步愈來愈近 日頭的喙鬚愈來愈長 故鄉的田塗愈來愈芳 逐家轉來鼻田塗味 外口鬧熱滾滾 內面冷吱吱 慣習泡二杯咖啡 年兜暝那啉那等你 干焦聽著老時鐘滴答滴 小小的溫度燃著過去 拍開柔柔的旋律 一人一杯一杯閣一杯 月娘也醉也綿綿 多情守到天光 智慧佮感情畫平行線 春天一走二十晃 你若重出世 你若無啉孟婆水 阮欲揣你講過去 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：走揣阿母的記持 【作者】：藍淑貞 【詩文】： 行入神農老街 親像行入歷史的長巷 拍開記憶的門窗 斟酌讀台灣 四百年受盡風霜的台江 歷史的舞台 一齣閣一齣 毋捌（bat)停止的戲 由繁華演到恬靜 竟然是一種美麗的收藏 當海岸線勼（kiu）去 覕（bih）佇遠遠的海邊 當船隻退出台江 日本人趕走三郊的繁華 五條港已經揣無水影 水仙宮猶原人聲喝 晚霞猶原赤炎炎 狹狹的長巷 將五條港的繁華 關入去深落的古厝 狹狹的長巷 留有祖先的血汗 留有阿母的血跡 嘛有阿母的記持 佮我小小的跤跡 時代的輪轉（lûn tsuán） 將阿母的血跡 硩佇紅毛塗底 阿母已經無塊揣 阿母已經無佇遮 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：思雙枝 【作者】：徐吉福 【詩文】： 細漢聽到思雙枝 感覺奚是阿爸阿母的大事 大漢想起思雙枝 心內卻有一點也掛意 等到阿爸阿母做仙去 才知也思雙枝也有我兮大事 思雙枝有阿爸兮聲 思雙枝嘛有阿母兮影 思雙枝有故鄉兮氣味 思雙枝是人兒時陣一個美麗兮記智 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：我欲砌一間處 【作者】：林鳳珠 【詩文】： 我欲砌一間處 毋是欲置山內砌一間處 是欲置心內砌一間處 我欲砌一間處 毋是欲用鋼筋砌一間處 是欲用石頭疊一間處 處兮內面攏無隔間 一塊大石桌加匟置窗也前 將即片窗也 畫出一幅活兮山景 將一壺茶 泡出歸間處兮清閒 處兮內面攏無間隔 一塊大石桌 會當做眠床更會當泡茶 若有涼涼兮風適好經過 會使加減入來做夥坐 我欲砌一間處 處兮門窗攏無設鎖 想欲動 我就處前處後懶懶逡 想欲靜 我就來壁邊打一個蓮花座 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：綿綿的台灣情愛-賀葉俊麟老先生七十大壽 【作者】：黃勁連 【詩文】： 落雨的暗暝 異鄉的港邊 阮時常唱你的歌詩 你的歌你的詩 解消阮滿腹的稀微 阮的細漢時 小小的年紀 雖然毋捌你 但是月光閃爍的暗暝 若唱你的「淡水暮色」 若唱你的「舊情綿綿」 會感覺趣味 感覺人生的歡喜 阮漸漸大漢 出外心悶的時 看著異鄉的船隻 來來去去 阮也是唱 你的歌詩 「放浪人生」 「再會夜都市」 你的歌你的詩 陪伴阮流浪的日子 如今阮已經大漢 阮已經捌代誌 若唱著「悲情的城市」 猶原不覺珠淚滴 阮知影你寫規千首的歌詩 攏是優美的台語詩 無輸日本的西條八十 阮知影這層代誌 伊代表的意義 親像春蠶吐絲 一絲一絲一絲一絲 阮欲追隨你的跤步 寫台灣味的台語歌詩 寫出台灣人的悲情 寫出台灣人的哀悲 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：水松 【作者】：蕭藤村 【詩文】： 寒--人 赤身裸體無捨施 熱--人 身穿羽毛頭向天 根若有塗通釘 就會活跳跳 骹若有水通浸 也𣍐死翹翹 寒熱由在天 死活隨在我 韌命是水松的名字 脆命是世人的名字 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：刺桐花開有時盡 【作者】：凃妙沂 【詩文】： 離開的靈魂，上愛踞佇刺桐花樹跤開講 名叫阿米契的祖公講西拉雅語 名叫土水的阿祖講漢語 名叫菊子的卡桑講日語 名叫阿財的孫仔講華語 名叫Joson的乾仔孫講英語 數念的靈魂，上悲哀是鬥陣無法度對話 有緣相拄無緣相安慰，刺桐花蕊紅艷艷 鹿仔樹猶原佇野外，恬靜仔生湠 每一種語言攏有故事，殖民的歷史 每一叢刺桐攏著蟲害，落土臭爛矣 每一个靈魂攏流目屎，沈重的哀愁 刺桐花開有時盡，你轉來等無時 刺桐花開有恩情，歷史誠無情 親像著蟲的老樹 等待死亡 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：毛蟹橫過路 【作者】：韓滿 【詩文】： 天清清 月圓圓 毛蟹橫過路 欲去海裡生卵 人𤲍𤲍 車濟濟 老母一命嗚呼 囝兒袂赴來出世 海風涼 海景媠 車輛歇路邊 眾人鬥保庇 五分鐘 保護一生 毛蟹拜謝逐家 趕緊去生湠後代 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：來茲啉一杯咖啡 【作者】：林鳳珠 【詩文】： 尋一個閒閒兮下晝 咱來茲啉一杯咖啡 像一片夏天兮白雲 輕輕也飛來偎近咖啡兮芳味 尋一個朋友來相尋兮下晝 咱來茲啉一杯咖啡 像一窟春天兮湖水 靜靜也照著咱形影兮相隨 啊！南洋兮氣味 親切兮情意 猶更有 佇吧檯內面做夥工作兮彼對伴侶 茲 就親像南門邊兮一句溫柔兮話語 恆春城外一首短短兮新詩 圖片來源：維基百科 / lienyuan lee 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：下暗 【作者】：韓滿 【詩文】： 烏雲 欲共心事暗崁 落來 一時仔煞予風吹去 天星 穿水銀的閃光衫 佇遐爍 來爍去 月娘 徛佇雲頂 看甲落下頦 兼歪腰 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：李仔酒 【作者】：藍淑貞 【詩文】： 親像紅寶石 囥千年袂變的色緻 敬李白的月 佇山花開的時 一杯閣一杯 酸甜仔酸甜 啉甲面仔紅吱吱 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：天送伯 【作者】：黃勁連 【詩文】： 天送伯，穿皮鞋 騎鐵馬去踅街 搖頭拌耳足聳勢 跤踏仔踏無好 摔一下摖破皮 叫阿娘叫老爸 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：菩提葉也迭飛 【作者】：簡秀如 【詩文】： 風輕輕也直吹 菩提葉也緩緩也迭飛 一陣清涼 鑽入去阮兮心官底 一片一片金色兮菩提葉也 落到滿四界 我親像有聽人迭細聲講話 敢是恁有參商過 大家欲作夥相招落地 生命咱同齊更來一回 你加看 奚樹也頂一暝兮時間攏更爆新芽 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：含笑 【作者】：韓滿 【詩文】： 日時 眾人的鬧熱 tshi̍日時 眾人的鬧熱 tshi̍h-tshah 含笑恬恬聽 毋敢開喙 欲暗 含笑開喙微微仔笑 予過路的人 一人紮一袋芳味轉去 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：牛墟 【作者】：劉惠蓉 【詩文】： 天頂日頭笑微微 雲尪頭敧敧 講欲來去踅牛墟 善化牛墟 聽打滴(tá-tih) 南北貨色規大堆 有人來遮 食泔糜配麵麶 有人買荔枝 啥人？兜欠家私 就來 踅牛墟 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：青春拖無窗 【作者】：韓滿 【詩文】： 夏至矣 毋過 心猶會寒 秋分矣 毋過 猶聽著蟬仔聲 楓仔葉開甲紅紅紅 較揣嘛揣無舊年彼一欉 梅花飄飄然飛飛飛 圍巾縖甲絚絚絚 接袂著你送的花芳 一冬又走去藏 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：天猶未光 【作者】：林鳳珠 【詩文】： 天猶未光 春天兮夢猶未醒 茨角鳥也佇耳也邊 吱吱喳喳直啼 夢內面有雨 夢外口有花 風 吹歸暝 雨 嘛落歸暝 若屆天光 奚花 毋知會落凡幾 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：煙火 【作者】：蕭藤村 【詩文】： 煙火好看無一時 跋落塗骹變身屍 錢咧燒哦人咧蝕 聽著肺咧喘大氣 煙火好看一目𥍉 人無存後隨化去 好額愈放愈旺氣 枵餓唱聲無採錢 煙火好看隨在伊 睏𣍐去啊睏𣍐去 煞煞去囉插插伊 大家死死做規堆 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：擔菜賣蔥 【作者】：黃勁連 【詩文】： 一支扁擔 兩跤草籠 為著生活鑽活縫 路邊 擔菜賣蔥 雖然小生理 但也有阮淡薄的希望 一日兩日 一工兩工 希望有成功的一工 有時風冷 有時霜凍 為著阮厝內大細 這枝扁擔毋敢放 一人啊一款命 每一人的都合無相仝 阮也認命 大街小巷 全精神擔菜賣蔥 一年兩冬 三年五冬 希望有成功的一工 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：拄著你 【作者】：韓滿 【詩文】： 看白鴒鷥踅山彼時 雄雄搪著你 心咇啵跳 跳袂離 牽動著夢中的情絲 毋敢問你的名 腦海中煞刻著你的形影 想你 想你 閣想你 想甲毋知日時暗暝 想甲無力喘氣 想甲人麻痺 想你 想你 閣想你 敢會使予阮閣一擺 拄著你 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：鞋破底原在 【作者】：黃勁連 【詩文】： 鞋破時 鞋底原在 無需要流目屎 衫破 伊的領原在 葉仔落 樹枝原在 樹枝 去 伊的樹身原在 樹仔被剉 伊的樹頭原在 阮老父雖然過身 但是伊留落來的 丈二，牌原在 伊練拳的範頭 伊的英雄氣概 永遠活佇阮的心內 鼓勵阮的跤步 一步 一步 行向擱較好的將來 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：茉莉合桂花 【作者】：千芬 【詩文】： 阮兮甥也今年欲四歲 伊會曉認兩種花 一種是茉莉 一種是桂花 秋天桂花開兮時 伊問： 「大姨，啊！茉莉花底時開﹖」 我講： 「桂花開值涼涼兮天氣， 就是穿長手䘼也衫兮時； 茉莉花會開值熱熱兮日子， 也就是穿短手䘼也衫兮時。」 阮兮甥也今年欲四歲 伊已經辨兩種花 一種是茉莉 一種是桂花 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：佔位 【作者】：蕭藤村 【詩文】： 我來唸歌送列位 人來出世走揣位 揣來揣去揣無位 無位的人呣知位 搶來搶去搶大位 細位想卜換大位 拚生拚死拚地位 拚生拚死拚天位 名位空空佇佗位 鎮位總無愛讓位 佔位共款踅原位 雙骹躘直歸本位 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：倒轉去阿母的腹肚內 【作者】：韓滿 【詩文】： 無愛吵鬧的世界 大細漢佇遐烏白哀 緊共門關起來 阮欲 倒轉去阿母的腹肚內 無愛垃圾的世界 烏煙罩霧閣含油滓 緊共門鎖起來 阮欲 倒轉去阿母的腹肚內 阿母的腹肚內 有迷人的音樂 有燒烙的地毯 天若光 阮就欲 對阿母的腹肚內出來 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：奚毋是歌 【作者】：林鳳珠 【詩文】： 值半眠半醒兮夢內 猶未翻身過來兮時 遠遠 有一種聲輕輕也迭叩 叩咱兮夢 叩咱夢內面彼片無鎖兮門窗 值半迷半清兮感覺 猶未清醒過來兮時 窗也外 有一種聲輕輕也迭叫 叫咱兮心 叫一種像置海內面兮沉浸 值所有兮聲音 攏猶未醒過來兮時 耳也邊 有一種聲輕輕也迭唱 天合地 也恬恬迭應、靜靜迭和 奚毋是歌 奚是佛寺兮早課 圖片來源：《桂花芳內兮歌》 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：國道八號 【作者】：劉惠蓉 【詩文】： 白雲輕輕 倚過天的胸坎 藍色的天 嘛聊聊仔將雲攬 無情風貼佇耳空邊 聲聲句句欲共雲𤆬走 目睭沙微的日頭 恬恬探頭講欲留 蒼天一陣 喉管滇 無志氣的目屎嘛直直流 春天躊躇的跤步 參著雨水 四淋垂綴咧吼 這條徛佇台南的八號公路 抑是無情放伊去 上北落南 行東往西 來來去去 依依難捨 抑是無情放伊去 國道八號啊~你敢攏毋知 敢毋知影 阮有偌濟的毋甘 只有綴空中的雲徙過台江 這條引阮思戀 行袂開跤的公路 故鄉永遠的情路 若坐雲霄飛車的台江大道 這條南台灣 思戀的八號公路 圖片來源：國道新建工程局 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：為何閣醉落去 【作者】：韓滿 【詩文】： 你駛目墘 害阮見笑面紅心虛 你的貼心 害阮路邊等規暝 毋管黃昏抑是早起 隨時等『line』安慰家己 逃袂過情海的纓纏 心魂顛來倒去 狂風大雨雄雄起 無講無呾 就離開 利針一分一分 一寸一寸 刺甲流血流滴 激堅強 笑咪咪 明其知 曖昧 的情袂圓 有夢無望 為何閣醉落去 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：月光光 【作者】：黃勁連 【詩文】： 月光光，照西庄 西庄的甘蔗園 甘蔗葉仔長長 月光光，照東庄 東庄的柑仔園 柑仔已經黃 月光光，照廳堂 廳堂頭前光焱焱 囡仔歡喜食冰糖 月光光，月光光 阿母佇灶跤 無閒咧炊籠床 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：逗逗仔 【作者】：凃妙沂 【詩文】： 囡仔的目睭愛留乎天頂的色緻 囡仔的鼻仔愛留乎花蕊的芳味 囡仔的手愛留乎樹皮的皺紋 囡仔的聲音愛留乎詩歌 囡仔的耳空愛留乎野鳥 囡仔的跤愛留乎土地 囡仔的心，愛留乎伊家己 世間的父母攏愛囡仔緊大漢 我向望你有一條逗逗仔行的路 我陪伴你去四界行踏 斑芝花的小路， 有尾蛺咧飛 四月的苦楝樹，有青笛仔咧唱歌 秋天的深山林內，有牛屎龜咧散步 我亦將走縱的跤步停落來 聽土地教咱的智慧 我將世間上祕密的鎖匙交乎你 獨立自由的心 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：來去湖邊 【作者】：林鳳珠 【詩文】： 天氣涼涼 湖邊兮紅磚也路攏無人 咱做伴行佇紅磚也路裡 慢慢也散步 輕輕也開講 天氣未寒 湖邊兮氣氛無相像入冬 咱做伴企佇紅磚也路邊 無都市兮吵鬧 有樹林兮清芳 湖彼邊兮樹也色 有兮黃黃、有兮紅紅 湖即邊兮樹葉也 有兮密密、有兮朗朗 稍暖稍暖兮日頭照過樹縫 幾陣也清風微微也迭相送 咱做伴坐置這恬靜兮湖邊 所有兮煩惱 攏會當加放 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：欲行對阿母的聽候 【作者】：韓滿 【詩文】： 天烏烏 雨粗粗 身軀淋甲澹糊糊 欲行緊 袂大步 無張持 人跋倒 車 一台一台咻咻叫 灯 一葩一葩直直照 心 一下一下踞踞趒 柺仔哪攏摸袂著 攑頭對天一直問 這條路哪會遐爾長 有厝是欲按怎轉 摸著矣 閣跋一倒 閣牚一擺 較艱苦嘛毋敢哀 天愈烏 雨愈粗 身軀咧摔烏寒雨 較細步 較緊到 欲行對阿母的聽候 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：歌仔先 【作者】：蕭藤村 【詩文】： 一枝喙捾一枝月琴 一把膽捾一把功夫 唸一世人 唱一世人 走唱江湖 走跳喙空 對頂港唱𢓜下港 對古代唱𢓜現代 心酸覕佇後壁 討趁𧺣去頭前 無奈何做頭前𤆬路 路有外遠聲外偌長 世間人啊看我殕殕 我看世間愈看愈霧 圖片中月琴主人：民謠歌手 高閑至 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。 只顯示部分資訊

【詩名】：風 吹來一兩片雲 【作者】：林鳳珠 【詩文】： 風 吹來一兩片雲 停佇後壁湖小小兮漁村 帶幾分也逍遙兮色彩 流連佇港外彼邊兮遊船 風 吹來一兩片雲 停佇彼支尖尖兮小山陵 帶幾分也春天兮色彩 慢慢也行對海彼邊兮黃昏 涼涼兮海風一陣一陣 搖來搖去兮椰子樹 有南洋兮氣氛 今暝 咱無愁無恨 無煩惱嘛無憂悶 坐置小灣即片闊闊兮沙墩 我知也 咱會使歸暝攏毋免睏 只是毋知也 踞佇海邊 看對外海兮彼隻大隻四腳也 敢宛若 也歸暝攏無睏﹖ 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：我毋是毋挃你 【作者】：韓滿 【詩文】： 你咧流目屎 我的心咧滴血 天 暗暗暗 雷 一直霆 就佇下昏 就佇下昏 是咱最後的一暝 你是我過去唯一的伴 今後我是欲對啥人剖心肝 我毋是毋挃你 是已經無氣力照顧你 無奈何才欲佮你分開 離別了後 只要我猶有咧喘氣 我會逐工去老牛的厝看你 請你著保重 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：兩岸的誓盟 【作者】：劉惠蓉 【詩文】： 滿天粉白的雲花 搖徙軟gio̍h幼肢影 海風送來陣陣愛慕 金色彩球㧒佇南台灣 㧒出滿滿的金絲黃 妝娗台江的嬌媚 飄撇的鹿耳門溪伸手 攬臺灣海峽的腰身 貼佇耳空邊 輕聲對伊來表白 蒼天變色 山崩石頭爛 攏袂改變 抑是地牛來翻身 一世人行相倚 永遠的山盟海誓 圖片來源：維基百科-洪邵歆攝 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。 滿天粉白的雲花 搖徙軟gio̍h幼肢影 海風送來陣陣愛慕 金色彩球㧒佇南台灣 㧒出滿滿的金絲黃 妝娗台江的嬌媚 飄撇的鹿耳門溪伸手 攬臺灣海峽的腰身 貼佇耳空邊 輕聲對伊來表白 蒼天變色 山崩石頭爛 攏袂改變 抑是地牛來翻身 一世人行相倚 永遠的山盟海誓 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：咱得歇一下 【作者】：林鳳珠 【詩文】： 咱工課若做到憚 會歇 咱得歇一下 咱路頭若行到殄 會歇 咱嘛歇一下 歇起來啉一寡也茶 配一寡也話 歇起來合一寡也心適兮人做夥 你若無嫌所在隘 來！你斡頭看一下 我身邊有一個位 等你過來做夥坐 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：夜婆 【作者】：黃勁連 【詩文】： 有翼會飛 人講伊毋是禽 有跤袂行路 人講伊不是獸 毋是禽也毋是獸 夜婆的處境誠艱難 時常予人恥笑 定定予人批評 所以歹勢甲 日時樹仔頂睏 暝時才出來飛 袂使見光 所以 無奈何在茫茫的夜色 飛來又閣飛去 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【作者】：藍淑貞 【詩文】： 抐桮 抐桮 面烏烏 跤長長 來到七股的田園 毋知恁兜是蹛偌遠 毋知北風是偌仔爾冷霜霜 故鄉的田園已經拋荒 出外討食心酸酸 毋知外鄉人情有偌長 毋知啥人會來相借問 徛佇南塘看四方 魚蝦海鮮是滿水塘 恁的照顧嘛真十全5 只是袂當消阮滿腹的心悶 向望南風透萬丈 𤆬阮回家門 原詩名為｢撓 "片不"」，為方便閱讀，改為教育部用字｢抐桮 」，其餘台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：換一个 回心轉意 【作者】：韓滿 【詩文】： 有一種癡 坐佇窗邊 咖啡已經涼 沓沓仔 溫予燒 閣慢慢仔等 干焦 等著冷風叫我戇 有一種迷 坐佇門邊 滿頭的烏頭鬃已經染 深深的心意斟予滇 閣勻勻仔 等 干焦等著月光笑我癡 猶閣咧 喘氣 阮用十年的時間 欲換一个 回心轉意 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：走相覕 【作者】：韓滿 【詩文】： 白翎鷥徛佇溪仔邊 看著魚仔誠歡喜 魚仔雄雄看著白翎鷥 那泅、那藏水 白翎鷥 那看 那啄 魚仔 那跳 那傱 一个來 一个去 兩个佇遐走相覕 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。 只顯示部分資訊

【詩名】：吳家的阿娘 【作者】：凃妙沂 【詩文】： 佇日本時代的煞尾 窟雷拉位新莊的巷仔底流行 惦惦旋過楊桃樹尾 美麗的阿娘破病昏倒佇楊桃樹跤 莊內無人敢去看護美麗的阿娘 干焦有楊桃花恬恬跋落來 美麗跪佇前埕懇求月娘救阿娘 傷心的目屎滴落佇楊桃花蕊 吳家的阿娘心腸親像天頂的月娘 伊共九歲的囡仔囥佇楊桃樹跤 家己一人去看護美麗的阿娘 幾日幾暝無看著天頂的月娘 美麗的阿娘逗逗仔好起來 吳家的阿娘欲行路轉去 猶未行到楊桃樹跤就倒落去 孤單的楊桃樹 吳家的小妹仔嚶嚶哮 阿娘無轉來厝內 阿娘攏無轉來厝內 吳家的三兄揹著伊的小妹 小妹仔你毋通哭 小妹仔你毋通哮 阿娘去天頂月娘伊兜 你若哭，目屎會糊著目睭 你就袂當看著阿娘 阿娘佇天頂月娘伊兜 笑微微看你大漢 ※原作華語榮獲2003年南瀛文學獎現代詩獎第一名 ※2011.11.20改寫為台語 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。 只顯示部分資訊

【詩名】：佮情批走標 【作者】：韓滿 【詩文】： 情批寄出 才發覺 情籽種了傷少 趕緊走來去 落情肥 吐情絲 牽情網 咧欲傱過青燈 紅燈就隨走來亂 傱過雞鵤仔的咕咕咕 傱過厝頂的樹影 月娘嘛綴阮走 日頭逐工攏浮上山 雞鵤仔逐工攏硞硞叫 共月娘叫甲肨奶 趕緊逐 愛佇情批到進前 走到娘仔兜 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。 這部影片中的配樂 瞭解詳情 立即訂閱 YouTube Premium，享受沒有廣告干擾的音樂饗宴 歌曲 Humanity 演出者 Multiple Chamber Ensemble 專輯 The Missing Nocturnes of Taiwan 授權 YouTube 的內容擁有者： The Orchard Music (代表Sunrise Records); BMI - Broadcast Music Inc.與 5 個音樂版權協會 只顯示部分資訊

【詩名】：月津印象 【作者】：蕭藤村 【詩文】： 一條港 親像月眉 引來過去的繁榮 八角樓依原徛在在 廟壁依原咧搬戲 猶久聽會著南管咧𨑨 猶久看會著鹽水咧製糖 一喙意麵 叫醒古早味 引來喙饞的喙舌 今朝的琴聲 喝水會堅凍 捒開鐵枝 開始衰微 一下瘟疫 點𤏸蜂仔炮 引來百外年的香火 昨日的蜂仔 重重疊疊 呣是蜂仔亂飛 風俗一直生湠 圖片來源：蕭藤村老師 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。 只顯示部分資訊

【詩名】：海若會租得 【作者】：林鳳珠 【詩文】： 海若會租得 咱來租一片海給匟置窗也前 有閒無閒 咱來看海兮心情 山若會徙得 咱來徙一支山給豎置窗也邊 早時暗時 咱來聞寡山兮氣味 風若有閒 咱請風給吹寡講有話兮道友來 坐置窗也內 做夥看山更看海 食臊嘛可以 抑無食素嘛會使 窗也邊咱給變出一桌酒菜 一缽是李白兮詩句 一缽是莊子兮故事 一缽是佛教兮偈語 更一缽 是咱共同兮興趣 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。 只顯示部分資訊

【詩名】：愛咱的土地 【作者】：溫存凱 【詩文】： 甘願做草仔 一枝草仔挽十斤塗 有塗的土地才有果子 甘願做樹仔 一欉樹仔顧半屏山 有山的土地才有生命 一粒沙拍交落，敢有人知 一斤塗拍交落，敢有人知 一座山拍交落，大家攏知 愛咱的草仔，愛咱的樹仔 愛咱的土地，愛咱的地球 留予囝孫永遠的希望 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：濁水溪ê福地－溪州 【作者】：楊昭勳 【詩文】： 東螺西堡徛佇溪邊喝咻 糖甘甜ê甘蔗 hō͘五分車載走囉 一港霜風將會社掃到無影隻 聖山奶水猶原飽淀 水稻一坵比一坵青翠 芭樂珍珠水晶佮帝王 黑鑽紫米攏是烏金 芳瓜仔甜閣厚汁 天年變面親像掀冊 庄跤逐工掩咯雞 尚鬧熱彼條街tè少年遠走都市 偆沓沓騎鐵馬ê老農 佮彼隻狗綴路 註: 1.聖山:指中央山脈。 2.芭樂:品種有水晶、珍珠、帝王等。 3.掩咯雞:捉迷藏 4.狗綴路:跟屁蟲。 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：咱疼惜的所在 【作者】：張東雄 【詩文】： 咱的土地四季 無缺欠花蕊 時陣若到 連塗跤都開花 櫻紅粉紫雪白金黃 真冗剩 毋但開佇枝椏 會鋪甲規四界 佇原野佇小徑佇轉頭斡角 色彩繽紛鬧熱豐沛 這種景緻 是咧共咱講 這塊土地豐饒熱情 是適合人蹛 又閣真媠的所在 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：溫柔的氣味 【作者】：馬秀鷹 【詩文】： 鹽水港月津橋邊風微微 阿母講 經過媽祖宮廟要求保庇 拜拜的糕啊好滋味 八掌溪南邊 岸內糖廠煙筒薰就天 阿爸認真做工去 叫阮 讀冊要有記誌 小火車鐵支路 五分車無閒刺刺 甘蔗疊尬滿滿是 送入會社 軋糖外銷好賺錢 乎阮過好日子 阿爸阿母 溫柔的聲音刻在耳邊 故鄉溫柔的氣味 是阮幸福的記誌 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：孤獨 【作者】：呂昭燕 【詩文】： 伊 毋是孤單 嘛毋是孤獨(ta̍k) 伊 是家己 佮家己鬥陣 的心適 是恬靜 無攪吵無紛雜 的清幽 是斟酌 去聽 家己彼个 心內底的聲 是覕佇 頭殼底 清清楚楚 咧愖 的時陣 是內心 佮家己 真實良善 表白的機會 孤獨(to̍k) 予咱 去揣著 看無的家己 享受 寂寞的甘甜 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：母語 【作者】：吳梅瑱 【詩文】： 母語 若親像 媽媽心咧跳的聲 母語的路 若像媽媽晟養阮的心情 阮若當時出頭天 媽媽 汝道毋免心驚膽嚇 母語 大自然的聲 親像 海湧浮動 水流的聲 樹頂鳥仔咧叫 山風咧吼的聲 彼是 萬物生長的源泉 母語 月娘的溫柔 宇宙的心聲 天星閃爍 日頭光的奢颺 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：桐花戀情 【作者】：王姿涵 【詩文】： 滿樹的桐花開滿浪漫 一蕊一蕊飛落塗跤 袂輸佇咧大地寫情批 愛人仔抾著白色的花 排出一個心，用真心 在土地寫出上媠的山盟海誓 樹仔頂的客鳥樂暢唱歌 親像咧風中寫美麗的詩 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：關心(觀新)海草礁 【作者】：千尋 【詩文】： 恬靜的西海岸 有䖙一个修道的老歲仔 人講伊是千歲爺 身軀浸佇海水內海洋生物足愛來 專家講是罕見的資源 起風湧的海岸 予伊日子毋好過 身軀煞來變成老倒勼面容那來那憂愁 壓霸勢力真恐怖淋廢水挖腹腸 不平靜的海岸聲 摻著老歲仔的喘氣聲 逐家毋通激外外 提高環保智識靠你我 圖片來源：桃園觀光導覽網 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：燉日子 【作者】：張鈺苹 【詩文】： 逐⽇暗暝 珠淚滲透枕頭ê時 會使倚靠--ê 只有眠床頭ê布尪仔 遐爾仔孤單。 / 我聽講 樓跤學⽣合作社 有咧賣治療寂寞ê藥包 ⼀包⼆⼗ ⽩⾊紙輕輕摺菅芒 煎(tsuann)來⽩⽩無芳 In講這就是⽣做⼀個⼈著愛儼硬(giám-ngē) ê滋味 Suah無⼈kā咱講 製造⽇⼦是啥⼈ê權利？ 我嘛已經無逃活ê籌碼(tiû-bé) 只好揣⼀个所在 Kā十七歲落葬。 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：彩色的故鄉 【作者】：蘇諭升 【詩文】： 我的故鄉是彩色的 天是藍色的 草地是青色的 洛神花是紅寶石 金針花是黃太陽 釋迦是青青的旋石 池上米是白色的仙女 紅藜的色水變來變去 我的眠夢嘛是彩色的 滿天五花十色的熱氣球咧飛 台東就是我彩色的故鄉 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。

【詩名】：金針山 【作者】：蘇瑋丞 【詩文】： 太麻里有一粒金針山 逐年的歇熱 青ling ling的山崙 變作滿滿的金黃 佇日頭跤愛咧閃爍 阿母的愛是我心內上媠的金針花 金針花！金針花！ 阿母的愛我藏佇心內底 充滿溫暖的我 嘛像滿山的金針花 佇日頭跤閃爍 大聲講出我滿滿的歡喜 註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。